نذیر انقلابی کا پیر گلی میں سڑک کا افتتاح، متعدد افراد کی مسلم لیگ ن میں شمولیت

 مسلم لیگ ن حلقہ نمبر2کےامیدوار اسمبلی محمد نذیر انقلابی نے پیرگلی کے مقام پر جاوید اختر کے گھر لنک روڈ کا افتتاح کیا اور مسلم لیگ ن میں جاوید اقبال،بابرعباس،انضمام احمد،عادل محمود کو اپنے کنبے قبیلے سمیت شامل ہونے پر خوش آمدید کہتے ہوئے ن لیگ پر مکمل اعتماد کا اظہار کرنے پر ان کا شکریہ ادا کیا اور مکمل تعاون کرنے کی یقین دہانی کرائی۔ تقریب کا باقائدہ آغاز تلاوت قرآن پاک سے کیا گیا جس کی سعادت حافظ طارق مدنی نے حاصل کی تقریب کی صدارت سماجی خدمت میں ایک بڑے نام محمد ندیم نے کی جبکہ مہمان خصوصی مسلم لیگ ن حلقہ 2 کے امیدوار اسمبلی محمد نذیر انقلابی تھے شرکاء تقریب سے خطاب کرتے ہوئے محمد نذیر انقلابی نے کہا کہ میرے لئے تمام ووٹر قابل عزت و قابل احترام ہیں اور ہم ان کے مسائل ترجع بنیادوں پر حل کرنے کے لئے ہمہ وقت حاضر ہیں

 اس 4 سالہ دور میں پلاک سے لے کر خالق آباد تک بلاتفریق ترقیاتی کام کیے ہیں اور آئندہ بھی اپنی خدمات جاری رکھے ہوئے ہیں مجھے بخوبی علم ہے کہ حلقے کے نوجوانوں کے کیا مسائل ہیں ان کی نوکریوں کا مسئلہ بہت اہم ہے مگر ہمارے اسمبلی میں نہ ہونے کی وجہ سے ہم مسائل کا شکار ہیں جس کی وجہ سے وہ حق جو نوجوانوں کا ہے ان کو نہیں مل رہا اور وہ ڈگریاں ہاتھوں میں لئے دھکے کھانے پر مجبور ہیں اگر اللہ نے مجھے موقع دیا اور آپ لوگوں نے مجھے پر مکمل اعتماد کرتے ہوئے اسمبلی کا ممبر منتخب کرادیا تو ان شاءاللہ ان تمام محرومیوں کا ازالہ کروں گا انھوں نے مزید کہا کہ ہم وزیراعظم راجہ فاروق حیدر خان کے شکر گزار ہیں کہ انھوں نےمیرٹ کی بالادستی کو قائم کرتے ہوئے احسن اقدامات کیے جس کی وجہ سے درجنوں اہل لوگ این ٹی ایس کے ذریعے ٹیچرز کی آسامیوں پر بھرتی اور پروموٹ ہوئے اس موقع پر راجہ فرید اسلم،راجہ توقیر نجیب ایڈووکیٹ ظاہرمحمود،راجہ محمد ندیم،راجہ خاورساحل نے بھی شرکائے تقریب سے خطاب کیا مقررین نے کہا کہ ہم کو حلقہ کی قائد محمد نذیر انقلابی پر مکمل اعتماد ہے اور اس بار الیکشن میں ہماری جیت ہوگی درجنوں لوگ دورسری جماعتوں سے ان کی کارکن کش پالیسیوں کی وجہ سے نذیر انقلابی کے قافلے میں شامل ہونے کے لئے تیار ہیں انھوں نے مزید کہا کہ ہمارا لیڈر تمام اعلی اوصاف و خوبیوں کا مالک ہے جس نے کبھی دھوکے اور فراڈ سے کام نہیں لیا نا ہی سکیمیوں سے کمیشن لیا ہے یہی وجہ ہے کہ سابقہ ادوار میں ہونے والے کاموں اور موجودہ دور میں ہونے والے کام میں نمایاں فرق ہے تقریب سے آخر میں میزبان تقریب جاوید اختر نے شرکائے تقریب اور مہمانوں اور قائدین کا شکریہ ادا کیا اور مزید تن من دھن لگاتے ہوئے بڑھ چڑھ کر محمد نذیر انقلابی کی سپورٹ کرنے اور ان کی جیت کو یقینی بنانے کے لئے اپنا کردار ادا کرنے کے عزم کا اظہار کیا۔

بوائز ہائی سکول اسلام گڑھ میں جشن آزادی کے حوالے سے تقریب کا انعقاد، حلقہ نمبردو کے ہائیر، ہائی اور مڈل مدارس کےنمائندگان کی شرکت

 بوائز ہائی سکول اسلام گڑھ میں  جشن آزادی کے حوالے سے حلقہ نمبر دو کے ہائیر، ہائی اور مڈل مداراس کی مرکزی تقریب کا انعقاد، حلقہ بھر کے صدر معلمین کی شرکت، جشن آزادی کو یوم تشکر کے طور پر منایا گیا، پاکستان کی ترقی و خوشحالی کے لیے تجدید عہد، مقبوضہ کشمیر میں جاری ظلم و ستم کو ختم کرانے کے لیے عالمی برادری کو اپنا کردار ادا کرنے کا مطالبہ، تقریب کے اختتام پر پاکستان کی ترقی و خوشحالی اور مقبوضہ کشمیر کی آزادی کے لیے دعا کی گئی۔

 تفصیلات کے مطابق بوائز ہائی سکول اسلام گڑھ میں جشن آزادی پاکستان کے حوالے سے حلقہ نمبر دو کے ہائیر، ہائی اور مڈل مدارس کی مرکزی تقریب کا انعقاد کیا گیا۔ تقریب کا آغاز تلاوت کلام پاک سے ہوا جس کے بعد نعت رسول مقبول ﷺ پیش کی گئی۔ نظامت کے فرائض سینئر ٹیکنیکل مدرس بوائز ہائی سکول اسلام گڑھ محمد انور نے سرانجام دیے۔ اس موقع پر جن مقررین نے خطاب کیا ان میں سینئر صدر معلم ہائی سکول اسلام گڑھ مختار احمد، صدر معلم ہائی سکول پوٹھہ بینسی شفیق احمد، صدر معلم ہائی سکول پنیام حافظ نوید اشرف، صدر معلم ہائی سکول چکسواری مسعود احمد، انچارج صدر معلم مڈل سکول آد ھ پلائی اللہ دتہ بسمل اور جونیئر ڈرائنگ مدرس ہائی سکول اسلام گڑھ عبداالرحمان مرزا شامل ہیں۔ مقررین نے کہا کہ پاکستان اقبال کا وہ خواب ہے جس کو تعبیر میں لاکھوں جانوں کا نذرانہ پیش کرنا پڑا۔ قائد اعظم محمد علی جناح کی ولولہ انگیز قیادت نے اس خواب کو حقیقت کا روپ دیا۔ پاکستان کی بنیاد دو قومی نظریہ پر رکھی گئی اور وقت نے ثابت کیا کہ یہ ایک حقیقت پسندانہ نظریہ تھا۔ آ ج پاکستان کی وجہ سے ہم آزادفضاوں میں سانس لے رہے ہیں۔ مذہب سمیت تمام معاملات میں ہمیں مکمل آزادی حاصل ہے۔ آزادی کی قدر و قیمت کا اندازہ لگانا ہوتو اس سے پوچھا جائے جو اس سے محروم ہے۔ آج کا دن تجدید عہد کا دن ہے اس دن ہم اپنے رب کا جتنا بھی شکر ادا کریں وہ کم ہے۔ 

ہمیں قیام پاکستان کے لیے قربانیاں دینے والوں کو نہیں بھولنا چاہیے۔ انہوں نے کہا کہ مقبوضہ کشمیر میں جاری تحریک آزادی کشمیر در اصل تکمیل پاکستان کی جنگ ہے۔ پاکستان کے پرچم میں لپٹے شہیدوں کے بدن اس بات کا واضح ثبوت ہیں کہ کشمیری اپنی آخری سانس تک پاکستان سے اپنی وفاداری نبھاتے رہیں گے۔ انہوں نے کہا کہ اگرچہ پاکستان نے اچھے انداز میں عالمی سطح پر کشمیر کا کیس لڑا ہے تاہم موجودہ حالات کے تناظر میں اس کو مزید موثر بنانے کی ضرورت ہے۔ عالمی برادری کو بھی مقبوضہ کشمیر میں جاری ظلم و ستم کا نوٹس لیتے ہوئے کشمیریوں کو ان کا پیدائشی حق حق ِ خودارادیت دلوانے میں اپنا کردار ادا کرنا چاہیے۔ انہوں نے کہا کہ انشاء اللہ بہت جلد مقبوضہ کشمیر میں آزادی کا سورج طلوع ہوگا اور کشمیر آزاد ہو کر پاکستان کا حصہ بنے گا۔ تقریب کے اختتام پر صدر معلم بوائز مڈل سکول گڑھا نسوال عبدالکریم چوھدری نے استحکام پاکستان، ملک کی ترقی و خوشحالی اور مقبوضہ کشمیر کی آزادی کے لیے دعا کی۔ 

زندہ قومیں اپنے اسلاف کی قربانیوں کو یاد رکھتی ہیں، 14اگست تجدید عہد کا دن ہے، سابق چیف جسٹس آزادکشمیر خان اعظم خان

 

سابق چیف جسٹس آزادکشمیر خان اعظم خان نے کہا ہے کہ یہ ہمارے باپ دادا کی قربانیوں کا صلہ ہے جو پاکستان کی شکل میں ہمیں ملا ہے جہاں پر ہم اپنے مذہب کے مطابق آزادانہ طریقہ سے اپنی زندگیاں بسر کرسکتے ہیں۔ قیام پاکستان کے لیے اپنی جانوں کی قربانیاں دینے والوں کے نام آج بھی سنہری حروف سے لکھے ہوئے ہیں۔ آج کا دن تجدید عہد کا دن ہے۔ 

ان خیالات کا اظہار انہوں نے بنگڑیلہ کمیونٹی ہسپتال میں یوم آزادی کے حوالے سے منعقدہ رنگا رنگ تقریب سے بحیثیت مہمان خصوصی خطاب کرتے ہوئے کیا۔ اس موقع پر چیرمین بنگڑیلہ کمیونٹی ہسپتال کونسلر محمد ندیم، میڈیکل سپرٹنڈنٹ ڈاکٹر راجہ سکندر اقبال، راجہ ابرار، نامور قانون دان تیمور علی خان ایڈوکیٹ، محمد امین، توقیر نجیب ایڈوکیٹ، طارق محمود سمیت کثیر تعداد میں افراد موجود تھے۔ تقریب کے آغاز میں پاکستان اور آزادکشمیر کے پرچم لہرائے گئے اور قومی ترانوں کی دھنیں پیش کی گئیں۔ کرونا وائرس ایس او پیز کی وجہ سے تقریب کا مختصر رکھا گیا۔ اس موقع پر کونسلر محمد ندیم نے تمام مہمانوں کا شکریہ ادا کیا۔ 

مہمان خصوصی سابق چیف جسٹس آزادکشمیر خان اعظم خان نے کہا کہ اپنے آباواجداد کی قربانیوں کے صلہ میں آج ہم آزاد فضاوں میں سانس لے رہے ہیں اس پر ہم اللہ پاک کا جتنا بھی شکر ادا کریں وہ کم ہے۔ آزادی ایک بہت بڑی نعمت ہے اور اس کی قدر وہی جان سکتا ہے جو اس سے محروم ہے۔ زندہ قومیں اپنے اسلاف کے کارناموں کو کبھی فراموش نہیں کرتیں۔ آج کا دن تجدید عہد کا دن ہے۔ انہوں نے کہا کہ قیام پاکستان کے لیے اپنے جان و مال کی قربانی دینے والوں کے نام آج بھی سنہری 

حروف سے لکھے ہوئے اور رہتے دنیا تک وہ ہماری نئی نسل کے لیے مشعل راہ کی حیثیت رکھتے ہیں۔  

اسلام گڑھ کنیلی رڑاہ کاکڑہ اور گرد و نواح میں لوڈشیڈنگ سے عوام پریشان

اسلام گڑھ اور ملحقہ علاقوں کنیلی رڑاہ کاکڑہ پوٹھہ بنگڑیلہ اور پیر گلی کراس میں بجلی کی غیر اعلانیہ اور طویل لوڈشیڈنگ نے عوام کا برا حال کردیا، شدید گرمی اور حبس میں بچے اور بوڑھے بے حال ہوگئے۔ بار بار کی ٹرپنگ اور کم وولٹیج سے قیمتی الیکٹرانکس اشیاء بھی جواب دینے لگیں۔تاجر برادری اور سول سوسائٹی نے احتجاج کے لیے سر جوڑ لیے۔ تفصیلات کے مطابق اسلام گڑھ اور ملحقہ علاقوں میں بجلی کی غیر اعلانیہ اور طویل لوڈشیڈنگ نے عوام کی زندگی اجیرن بنا دی ہے۔ دن اور رات کی بار بار کی۔لوڈشیڈنگ سے بچے اور بوڑھے نڈھال ہوکر رہ گئے ہیں۔ کم وولٹیج اور لوڈشیڈنگ سے لوگوں کی قیمتی الیکٹرانکس اشیاء جلنے لگی۔ دن کے اوقات میں بجلی کی لوڈشیڈنگ سے بجلی سے مشروط کاروبار تباہ ہوکررہ گئے ہیں۔ کرونا سے تباہ شدہ کاربار مزید بدحالی کا شکار ہورہے ہیں۔ اسلام گڑھ کی تاجر برادری اور سول سوئٹی نے محکمہ برقیات کے خلاف احتجاج کے لیے سر جوڑ لیے ہیں۔

میرپور سماہنی روڈ شاہراہ جموں کے نام سے منسوب

 میرپور سماہنی روڈ براستہ پیر گلی کو شاہراہ جموں کے نام سے منسوب کرنے کے بعد محکمہ شاہرات کی طرف سے شاہراہ جموں کا بورڈ نصب کردیا گیا۔ تفصیلات کے مطابق صدر ریاست کی طرف سے گزشتہ روز میرپور سماہنی روڈ براستہ پیرگلی کو شاہراہ جموں کے نام سے منصوب کیا گیا تھا جس کے بعد محکمہ شاہرات کی طرف سے مذکورہ سڑک پر جٹی ڈھیری کراس کے مقام پر شاہراہ جموں کا بورڈ نصب کردیا گیا ہے۔ عوامی حلقوں کی طرف سے اس شاہراہ کو شاہراہ 

جموں کے نام سے منصوب کرنے کو سراہا جارہا ہے۔

رٹھوعہ ہریام پل کو جلد از جلد مکمل کیا جائے، لندن کے کونسلر کا وزیراعظم عمران خان کو مکتوب

لنڈن کے کشمیری نژاد کونسلر ڈاکٹر ذوالفقار نے رٹھوعہ ہریام برج کی عدم تکمیل پر وزیر اعظم پاکستان کو مکتوب تحریر کردیا، مکتوب میں 2016 میں مکمل ہونے والے منصوبہ کی عدم تکمیل پر عوامی تحفظات سے آگاہ کیا گیا ہے۔ میرپور کی عوام کے لیے لائف لائن کی حیثیت رکھنے والے منصوبہ کی تکمیل سے علاقہ میں سیاحتی سرگرمیوں کو فروغ ملنے کے ساتھ ساتھ معاشی ترقی بھی ہوگی، مکتوب میں پاکستان کی ترقی اور خوشحالی کے لیے دو بار گھر بار زیر آب لانے والے اہل میرپور کی قربانیوں کا بھی ذکر،منصوبہ کو جلد از جلد مکمل کرنے کے لیے کردار ادا کرنے کا مطالبہ۔ تفصیلات کے مطابق نیوہیم لنڈن کے کشمیری نژاد کونسلر و چیرمین کشمیر گروپ برطانیہ ڈاکٹر ذوالفقار علی نے رٹھوعہ ہریام پل کی عدم تکمیل اور تاخیر پر وزیر اعظم پاکستان عمران خان کو مکتوب تحریر کیا ہے جس میں تارکین وطن کشمیریوں بالخصوص برطانیہ میں مقیم میرپور کمیونٹی کی طرف سے شدید تحفظات کا اظہار کیا گیا ہے۔ مکتوب میں کہا گیا ہے کہ رٹھوعہ ہریام پل جس کو 2016 میں مکمل ہونا تھا تاحال مکمل نہیں ہوسکا ہے اور طویل عرصہ سے اس کا کام بھی بند ہے جس سے منگلا ڈیم کے لیے دوبار گھر بار کی قربانی دینے والوں کو شدید تحفظات لاحق ہیں۔ رٹھوعہ ہریام برج اہل میرپور کے لیے لائف لائن کی حیثیت رکھتا ہے اور اس منصوبہ کی تکمیل سے یہاں پر سیاحتی سرگرمیوں میں اضافہ ہوگا۔ اس کے ساتھ ساتھ علاقہ کی معیشت پر بھی مثبت انداز مرتب ہونگے۔ رٹھوعہ ہریام برج ڈیم اپریزنگ کے وقت متاثرین منگلا ڈیم کے لیے ایک تحفہ کی حیثیت رکھتا تھا لیکن اس کو حسب وعدہ مکمل نہ کرنے پر عوام کا حکومتی وعدوں سے اعتماد اٹھتا جارہا ہے۔ آپ بحیثیت وزیر اعظم پاکستان وزارت امور کشمیر کو اس منصوبہ کو جلد از جلد دوبارہ شروع کرکے مکمل کرنے کے احکامات جاری کریں تاکہ عوام میں پائی جانے والی پریشانی کا خاتمہ ہوسکے

روپیال میرج ہال کے زمین بوس ہونے کی تحقیقاتی رپورٹ آگئی

 میرپور (پی آئی ڈی )10 اگست 2020ء

سانحہ چکسواری روپیال میرج ہال کے زمین بوس ہونے کی وجوہات جاننے کے لیے ضلعی ایڈمنسٹریشن کی طرف سے بنائی گئی تحقیقاتی کمیٹی کے چیئرمین و ناظم پبلک ہیلتھ انجینئرنگ و سٹریکچرل انجینئر تنویر احمد قریشی نے بتایا کہ روپیال میرج ہال چکسواری کی بلڈنگ زمین بوس ہونے کی وجوہات میں سب سے بڑی وجہ عمارت کا سٹریکچرل ڈیزائن کانہ ہونا اور دوسرا بلڈنگ میں بغیر کسی سٹریکچرل انجینئر کی مشاورت سے مرمتی کا کام ہونا اور ساتھ ہیRCC دیوار کو توڑکر راستہ بنانا تھا بلڈنگ میں دھماکہ ہونے کا کوئی بھی عنصر نہیں پایا گیا۔

ان خیالات کا اظہار انھوں نے یہاں ڈپٹی کمشنر آفس میں میڈیا بریفنگ دیتے ہوئے کیا اس موقع پر ایکسین بلڈنگ سٹریکچرل انجینئر شہزادہ اورنگزیب اور اسسٹنٹ کمشنر منیر احمد قریشی بھی موجود تھے۔ ناظم پبلک ہیلتھ انجینئرنگ و سٹریکچرل انجینئر تنویر احمد قریشی نے بتایا کہ ضلعی انتظامیہ کی طرف سے سانحہ روپیال میرج ہال کے گرنے کی وجوہات جاننے کے لیے 8رکنی کمیٹی بنائی گئی تھی۔

کمیٹی نے روپیال میرج ہال کے آرکیٹیکٹ محمد ریاض آف گجرات اور ٹھیکیدار بوٹا کو سماعت کیا جس کے بعد موقع پر جاکر تباہ شدہ عمارت کا جائزہ لیا گیا انھوں نے بتایا کہ چار منزلہ میرج ہال بناتے وقت ابتدائی فاؤنڈیشن کی بنیادیں انتہائی کمزور رکھی گئی ا سطرح بلڈنگ کی ہر چھت پر 8انچ سے 1فٹ تک مٹی وغیرہ ڈالی گئی تھی۔پہلے فلور میں چاولوں کا سٹاک بھی رکھا گیا تھا دوران مرمتی میرج ہال میں مختلف تعمیراتی/مرمتی کے کام جاری تھے جن میں ہیوی سیلنگ سمیت RCCدیوارکو ہلٹی سے توڑا گیا انھوں نے بتایا کہ ادارہ ترقیات اور میونسپل کارپوریشن میں نان ٹیکنیکل لوگ نقشہ جات پاس کر رہے ہیں جس کے باعث اس طرح کے واقعات رونما ہونے کے مزید خدشات موجود ہیں انھوں نے حکومت کو تجویز دی کہ ضلع میرپور میں 3یا اس سے زائد منزلہ نان ڈیزائن شدہ عمارات کا فوری طور پر سٹریکچرل انجینئر سے سرو ے کروایا جائے تاکہ ان عمارات کے بارے میں معلومات حاصل ہوسکیں کہ یہ عمارات قابل استعمال ہیں یا نہیں۔انھوں نے مزید کہا کہ گزشتہ سال آنے والے زلزلوں کے باعث یہاں مسقبل میں بننے والی عمارات کی تعمیر بلڈنگ کوڈز کے مطابق زلزلہ پروف ہونی چائیے۔

تعریف ہے سب تیری تو ہےرب جہانوں کا

 

رٹھوعہ ہریام پل کا 17سالوں میں مکمل نہ ہونا لمحہ فکریہ ہے، کونسلر محمد ندیم

 پیٹربرا سٹی کے کونسلر محمد ندیم نے کہا ہے کہ 17سال گزرنے کے باوجود رٹھوعہ ہریام پل کا مکمل نہ ہونا لمحہ فکریہ ہے، دو مرتبہ آبااجداد کی قبروں کی قربانی دینے والے آج بھی اپنے حقوق کے لیے دربدر کی ٹھوکریں کھا رہے ہیں۔ حکومت پاکستان وآزادکشمیر اس نامکمل منصوبہ کے تکمیل کے لیے جلد از جلد اقدام اٹھائیں۔ تارکین وطن میں رٹھوعہ ہریام پل کی عدم تکمیل کے حوالے سے خاصے شکوک و شبہات پائے جاتے ہیں۔ ان خیالات کا اظہار انہوں نے اپنے ایک بیان میں کیا۔ انہوں نے کہا کہ ترقی یافتہ ممالک میں کسی بھی منصوبہ کی تکمیل کے لیے ایک ٹائم فریم دیا جاتا ہے لیکن یہ دیکھ کر بہت افسوس ہوتا ہے کہ ہمارے ملک میں شروع کیے جانے والے منصوبہ جات کی تکمیل کے لیا سال ہا سال لگ جاتے ہیں جس سے جہاں ایک طرف عوام کو مشکلات کا سامنا کرنا پڑتا ہے وہیں پر اس منصوبہ کی لاگت میں کئی گنااضافہ ہوجاتا ہے۔ یہی صورتحال رٹھوعہ ہریام پل کی ہے جس کو شروع ہوئے اب تقریبا 17سال کا عرصہ گزر چکا ہے لیکن یہ منصوبہ مکمل ہونے کا نام ہی نہیں لے رہا۔ حکومتوں کی عدم توجہ اور کرپشن اس منصوبہ کی تکمیل میں سب سے بڑی رکاوٹیں رہی ہیں جس کا خمیازہ عوام کو بھگتنا پڑ رہا ہے۔ رٹھوعہ ہریام پل میرپور، بھمبر اور کوٹلی کے اضلاع کی تقدیر بدلنے کی صلاحیت رکھتا ہے لیکن افسوس کے ساتھ کہنا پڑتا ہے کہ اس کی تکمیل کی طرف کوئی توجہ نہیں دی جارہی۔ انہوں نے کہا کہ اس منصوبہ کی عدم تکمیل سے تارکین وطن کے اندر سخت شکوک و شبہات پیدا ہورہے ہیں۔ انہوں نے وفاقی حکومت، حکومت آزادکشمیر اور دیگر متعلقہ محکمہ جات سے مطالبہ کیا ہے کہ اس منصوبہ کو جلد ازجلد مکمل کیا جائے تاکہ عوام کی اضطرابیت کا خاتمہ ہوسکے۔

غازی سنگل وکٹ کرکٹ کپ چکسواری کے تریال خان اور شاہد خان نے اپنے نام کرلیا

 غازی سنگل وکٹ کرکٹ کپ چکسواری کے تریال خان اور شاہد خان نے اپنے نام کرلیا، فائنل میں عتیق اور شاداب مجید کی جوڑی کو شکست، ٹورنامنٹ میں ضلع بھر سے 46ٹیموں نے شرکت کی۔ تفصیلات کے مطابق غازی کرکٹ کلب اسلام گڑھ کے زیر اہتمام منعقدہ غازی سنگل وکٹ کپ اختتام پذیر ہوگیا۔ ٹورنامنٹ حیدر آباد اسلام گڑھ کرکٹ گراؤنڈ میں انعقاد پذیر ہوا جس میں کھڑی، شریف، جہلم، میرپور، کاکڑہ ٹاؤن، اسلام گڑھ، چکسواری اور ڈڈیال کی 46ٹیموں نے شرکت کی۔ 

ٹورنامنٹ آرگنائزرز میں راجہ عاصم رشید، عدیل عارف، شانی، احسان شامل تھے۔ فائنل میچ چکسواری کے تریال خان و شاہد خان 

اور عتیق اور شاداب مجید کی جوڑی کے درمیان کھیلا گیا جسے تریال خان اور شاہد خان نے اپنے نام کرلیا۔ ٹورنامنٹ میں قومی و علاقائی سطح کے نامور کھلاڑیوں شاداب مجید، زمان خان، حمزہ شاہ، انیس، عابد فرید، محسن ملک،عزیر، عتیق، رحمت خان، شاہد، گودڑ، صداقت،تریال خان، شجاع  اور شانی نے شرکت کی۔فائنل میچ کے اختتام پر کھلاڑیوں میں انعامات تقسیم کیے گئے۔  

لوکل گورنمنٹ بورڈ نے ریٹائرڈایس ڈی او کو میونسپل کارپوریشن میرپورمیں ایڈھاک ٹآون پلانر تعینات کردیا، نوجوان نسل دربدر کی ٹھوکریں کھانے پر مجبور

 آزادکشمیر لوکل گورنمنٹ بورڈ کی انوکھی منطق، ریٹائرڈ ایس ڈی اوکو کنٹریکٹ بنیادوں پر میونسپل کارپوریشن میرپور میں ٹاون پلانر تعینات کردیا، نوجوان نسل ہاتھوں میں ڈگریاں لیے دربدر کی ٹھوکریں کھانے پر مجبور، اپنے آپ کو میرپور کے حقوق کا محافظ کہنے والی سیاسی قیادت نے بھی چپ کا روزہ رکھ لیا۔ تفصیلات کے مطابق آزادجموں و کشمیر لوکل گورنمنٹ بورڈ مظفرآباد نے ایک ریٹائرڈ ایس ڈی او کو کنٹریکٹ بنیادوں پرمیونسپل کارپوریشن میرپور میں ٹاون پلانر تعینات کردیا ہے۔ اس تعیناتی سے نوجوان نسل جو ہاتھوں میں ڈگریاں لیے نوکریوں کے لیے دربدر کی ٹھوکریں کھارہی ہے کی حق تلفی کی جارہی ہے۔ کنٹریکٹ بنیادی پر ایک ریٹائرڈ ایس ڈی او کو ٹاون پلانر تعینات کرنے کی بجائے نئے سرے سے بذریعہ اشتہار نئی تعیناتی عمل میں لانا زیادہ مستحسن اقدام تھا جس سے نوجوانوں کے لیے حصول روزگار کے مواقع پیدا ہوتے۔ میرپور کی سیاسی قیادت جو اپنے آپ کو میرپور کے حقوق کا محافظ کہتی ہے وہ بھی اس تعیناتی پر خاموش تماشائی کا کردار ادا کررہی ہے۔ ضلع میرپور کی سماجی حلقوں نے وزیر بلدیات سے مطالبہ کیا ہے کہ وہ اس تعیناتی کو فی الفور منسوخ کرتے ہوئے بذریعہ اشتہار آسامی کو پر کرنے کے احکامات صادر فرمائیں تاکہ کسی کی حق تلفی نہ ہوسکے۔ 

اسلام گڑھ میں پولیو مہم کے حوالے سے تربیتی ورکشاپ، ڈی ایچ میرپور کی خصوصی شرکت

 آزادکشمیر میں رواں ماہ ہونے والی پولیو مہم کے حوالے سے اسلام گڑھ میں محکمہ صحت کے اہلکاران کی تربیتی ورکشاپ، DHOمیرپور ڈاکٹر فدا حسین راجہ کی ٹریننگ ورکشاپ میں خصوصی شرکت، پولیو مہم کے دوران حسب سابق اپنے اہداف پورے کرنے کی ہدایات، ٹریننگ کا دوسرا سیشن 11اگست کو ہوگا۔ تفصیلات کے مطابق  میونسپل کمیٹی اسلام گڑھ کی وارڈز 1 اور 2 کی پولیو ٹیمز کی ٹریننگ کا انعقاد کیا گیا۔ ٹریننگ کے دوران کرونا ایس او پیز کا مکمل اہتمام کیا گیا۔  یونین کونسل میڈیکل آفیسر اسلام گڑھ  قاضی عبدالعلیم نیہمراہ ایریا انچارج صاحبان ٹیموں کو آئندہ ہفتے  شروع ہونے والی پولیو مہم کی ٹریننگ دی۔ ضلع بھر میں منعقد ہونے والے ٹریننگ سیشنز کی طرح حسب پروگرام جناب ڈی ایچ اومیرپور ڈاکٹر فدا حسین راجہ نے از خود نگرانی کی۔ اسلام گڑھ کے تربیتی سیشن میں جناب ناظم صحت نے تمام شرکاء کی تربیت چیک کرتے ھوئے تفصیلی سوالات کئے جن کے شرکاء  نے بھر پور جوابات دئیے۔ یو سی ایم او اسلام گڑھ  قاضی عبدالعلیم نے   ڈی ایچ اومیرپور کی تشریف آوری پر ان کا شکریہ ادا کرتے ھوئے انہیں کووڈ 19 کے دوران مثالی خدمات انجام دینے پر وزیر اعظم پاکستان کے تعریفی سرٹیفکیٹ اورانعامات حاصل کرنے پرمبارک باد پیش کی۔   ڈی ایچ اومیرپور  نے یو سی ایم او اور ایریا انچارج صاحبان اور ٹیموں کی خدمات کی بہت تعریف کی اور ان کی  بھر پور حوصلہ افزائی فرمائی اوردوران کیمپین سابقہ روایات کو برقرار رکھتے ہوئے بھر پور محنت کی تلقین کی۔میو نسپل کمیٹی اسلام گڑھ کی بقیہ ٹیموں کی تربیت  11 اگست کو ہو گی۔

پانچ سال قبل بچھڑنے والے بچے کو اپنے والدین سے ملانے میں مدد کریں

  پانچ سال قبل والدہ سے بچھڑنے والا بچہ اپنے والدین کی تلاش میں، عمرتقریبا10سال، نام قاسم اور والدہ کا نام تسلیم بتاتا ہے، گھر کا ایڈریس معلوم نہیں، خود کو آزادکشمیر کا رہائشی بتاتا ہے۔ بچہ اس وقت لالہ موسیٰ تھانہ میں موجود ہے، سب انسپکٹر لالہ موسیٰ کی خبر کواخبارات اور سوشل میڈیا کے ذریعے پھیلا کر بچے کو والدین سے ملانے کی استدعا۔ تفصیلات کے مطابق سب انسپکٹر لالہ موسیٰ کو لاہور ریلوے اسٹیشن سے ایک بچہ ملا ہے جس کی عمر تقریبا 10سال ہے۔ بچے کے مطابق وہ تقریبا پانچ سال قبل اپنے ماں جا کا نام وہ تسلیم بتاتا ہے کے ساتھ گھر سے نکلا تھا اور راستے میں کئی بچھڑ گیا تھا۔ بچے کے مطابق وہ پہلے کوئٹہ میں تھا۔ وہ اپنا نام قاسم بتاتا ہے۔ بچے کو اپنے گھر کا ایڈریس تو معلوم نہیں تاہم اس کو اس بات کا ادراک ہے کہ وہ آزادکشمیر کا رہنے والا ہے۔ سب انسپکٹر لالہ موسیٰ نے بذریعہ ایس ایچ او تھانہ اسلام گڑھ چوھدری وسیم نواز اس خبر کو قومی اخبارات اور سوشل میڈیا وائرل کرکے بچے کے والدین کی  تلاش میں مدد کی استدعا کی ہے۔ 

j

 

بلدیہ اسلام گڑھ کی عید پر عیدی مہم، قصابوں کی رجسٹریشن کے نام پر ہزاروں بٹور لیے

 عید پر قصابوں کی رجسٹریشن کے نام پر بلدیہ اسلام گڑھ بے ہزاروں روپے بٹور لیے، 500 روپے فی قصاب کے حساب سے سو کے قریب قصابوں نے رجسٹریشن کروائی، رجسٹرڈ قصابوں کی ٹیسٹ رپورٹ بھی بروقت نہ آسکی، ایڈمنسٹریٹر بلدیہ کے اپنے ہی گھر میں جانور ذبح کرنے والے قصاب کی رپورٹ بھی پازیٹو آگئی جو اسے عید کے تیسرے روز ملی۔ تفصیلات کے مطابق بلدیہ اسلام گڑھ نے عید پر قصابوں کی رجسٹریشن کی مد میں ہزاروں روپے کی دیہاڑی لگا لی۔ بلدیہ کی طرف سے فی قصاب 500 روپے رجسٹریشن فیس مقرر کی گئی تھی۔ ایک اندازے کے مطابق بلدیہ اسلام گڑھ کی حدود میں سو کے لگ بھگ قصابوں نے اپنی رجسٹریشن کروائی۔ دوسری طرف رجسٹر کیے گئے قصابوں کی ٹیسٹ رپورٹس بھی بروقت نہ آسکیں اور قصاب بغیر رپورٹ کے ہی جانور ذبح کرتے رہے۔ ایڈمنسٹریٹر بلدیہ کے اپنے ہی گھر میں جانور ذبح کرنے والے قصاب کی رپورٹ عید کے تیسرے روز آنے پر مثبت نکل آئی جس نے متعدد دیگر گھروں میں بھی جانور ذبح کیے تھے۔ اسلام گڑھ کے قصابوں میں بلدیہ کی طرف سے 500 روپے فیس لینے اور پھر رپورٹس بھی بروقت نہ دینے پر غم وغصہ پایا جاتا ہے۔

اسلام گڑھ کے ماضی کے نامور کرکٹر ندیم سعید قریشی حرکت قلب بند ہونے سے خالق حقیقی سے جاملے

اسلام گڑھ کے ماضی کے نامور کرکٹر، برطانوی صحافی آصف قریشی کے کزن اور سعید آئرن مرچنٹ میرپور کے مالک ندیم سعید قریشی حرکت قلب بند ہونے سے خالق حقیقی سے جاملے، ندیم قریشی انتہائی ملنسار اور شریف النفس انسان تھے، ان کی اچانک موت کی خبر اسلام گڑھ میں جنگل کی آگ کی طرح پھیل گئی، نماز جنازہ ڈھلہ اسلام گڑھ میں ادا کردی گئی۔ تفصیلات کے مطابق اسلام گڑھ کے ماضی کے نامور کرکٹر، برطانوی صحافی آصف قریشی کے کزن اور سعید آئرن مرچنٹ میرپور کے مالک ندیم سعید قریشی دل کا دورہ پڑنے سے خالق حقیقی سے جاملے۔ وہ ایک ہفتہ قبل ہی برطانیہ سے پاکستان آئے تھے۔ وہ انتہائی ملنسار انسان اور شریف النفس شخصیت کے مالک تھے۔ ان کی موت سے اسلام گڑھ کی فضا سوگوار ہوگئی۔ ان کی نماز جنازہ آبائی گاوں ڈھلہ میں ادا کردی گئی۔

Add caption